完美髮學研究所 | 全新主持組合登場！分享染後護理＋洗頭小貼士！

今集《完美髮學研究所》有全新組合！分別有全新主持可宜、桂圓美創辦人黃創安先生同Giselle！今集三位繼續同大家探討唔同頭髮問題同護髮小貼士～

可宜的頭髮煩惱⋯⋯？

節目一開始，黃生就介紹點解要搵可宜做頭髮健康節目。原來可宜頭髮雖然多 ，但其實佢都有唔少頭髮問題，例如最令佢擔心嘅甩頭髮問題：每次吹頭時， 都見住啲頭髮係咁飛出嚟，吹完頭成地都係頭髮，真係越甩越擔心！

可宜仲有白頭髮嘅問題，因為平時經常要出鏡，所以佢定期6個星期左右就要染一次頭髮，染完後又引發頭痕、頭皮敏感、甩頭髮等問題，佢真係好驚問題越嚟越嚴重，會越甩越多甚至見到頭肉！

而且每次出Job嘅時候，乾旱髮絲都會影響整體造型，即使個妝化得完美，但髮型都相當重要！所以今次佢就請教頭髮專家黃創安先生，究竟點樣先可以好好護理髮絲同急救頭皮健康？